هندسة البترول

بوست تعريفي للراغبين بدراسة هندسة البترول في جامعتي البعث والفرات إذا بدنا نحكي عن الفرع لازم نحط كلمة المصاري على جنب ونركز شوي بتفاصيل الفرع وموادوا ومستقبلوا . هندسة البترول خمس سنين متل أي هندسة بسوريا أول سنتين بتدرس فيهم علوم أساسية متل الرياضيات 1 و2 و3 و الكيمياء والفيزياء و الوصفية والرسم الهندسي و علوم الجيولوجيا العامة وجيولوجيا النفط والبنيوية وعلم الصخور بعدين بالسنة التالتة بتبلش تدرس أساس هندسة البترول من الهيدروليك و فيزياء الطبقة النفطية وميكانيكا تفتيت و هندسة الحفر 1 بالسنة الرابعة رح تحس حالك بلشت تفوت بالجو مزبوط وتفهم هندستك لأن السنة كلها اختصاص بحت وبتدرس فيها آلات الحفر و جيوفيزياء الآبار و هندسة الحفر بشكل موسع و بتدرس عمليات التنقيب السايزمي والمخزون والانتاج كمان وبالخامسة بتاخد كمان أهم المقررات متل الحفر البحري و المخزون و صيانة الآبار و نقل النفط والغاز . الفرع بدو حفظ بنسبة كبيرة و فهم كمان يعني لازم يكون عندك قدرة على الحفظ والفهم بنفس الوقت وبدك تتعب حالك بدراستك لأن البترول بالذات فرع بدو دراسة وجد وتعب إضافة لهل الشي أهم شغلة تتقن اللغة الانكليزية و تتعلمها وتطور حالك فيها لأن مهندس بترول بدون انكلش يعني زيرو و كمان في شغلة تانية لازم تطور حالك بالبرمجيات و الكومبيوتر رح يلزموك كتير مستقبلاً جامعة البعث كمحتوى علمي ممتاز جداً و بتاخد كل المعلومات بشكل جيد جداً بس احسب حسابك عملي متلوا متل النظري مع أنو في تطوير للمخابر بس بالحقيقة الخبرة بتاخدها من الحقول بعملك بعد التخرج حاول كمان يكون عندك مراجع عربية أو إنكليزية وفيديوهات رح تستفيد منها بشكل كبير بدراستك مستقبلها منيح هون وبرا و الموضوع بس بحاجة فرصة سواء هون أو برا البلد . أهم شي تحب فرعك و يكون رغبتك بعيد عن كلمة المصاري والبترول يلي كل العالم رابطينها مع بعض ومو كل مين يتخرج بيكون مهندس المهم تحتفظ بأكبر قدر من المعلومات و تفهمن وتطبقن بس اشتغلت . طبعا الفرع بتدرس فيه 4 اختصاصات مع بعض الحفر والإنتاج و التنقيب و المخزون . أي استفسار بنرد عليه .